Shkup, 21 tetor 2025 – Juristi dhe aktivisti Artan Dika ka bërë të ditur sot se është ftuar nga Prokuroria Themelore e Shkupit për të dhënë informacione lidhur me lëndën penale KO-2460/25, që ka të bëjë me kallëzimin penal ndaj Mendi Qyrës dhe kompanisë “Trim” për veprën penale të mashtrimit.
Sipas Dikës, ndërsa po përgatitej për të dorëzuar një kërkesë zyrtare për informacion mbi ecurinë e kallëzimit, është kontaktuar me telefon nga një përfaqësuese e Prokurorisë.
“Jemi nga Prokuroria Themelore Shkup – më tha një zë femre – ju kemi dërguar një ftesë për të ardhur në prokurori për të dhënë informacion për lëndën KO-2460/25 ndaj Z. Mendi Qyra dhe kompanisë ‘Trim’ në datën 6 tetor, por nuk keni ardhur,” ka treguar Dika.
“Nuk kam marrë asgjë,” – u përgjigj ai – “këtu postierët i hedhin letrat ku munden.”
Pas komunikimit, palët ranë dakord që Dika të paraqitet në Prokurori në një datë të re që do të përcaktohet.
Në fund të reagimit të tij publik, Dika vlerëson se mbetet për t’u parë si do ta trajtojnë organet e drejtësisë këtë rast, që sipas tij përfshin “vepër penale të mashtrimit në shuma të mëdha dhe në vazhdimësi”, duke theksuar se personi i kallëzuar, Mendi Qyra, është një nga kandidatët kryesorë të koalicionit VLEN dhe VMRO, aktualisht në pushtet
