Në emisionin “Debat Plus” , analisti Visar Ymeri diskutoi për situatën politike të Kosovës dhe marrëdhëniet e saj me Shtetet e Bashkuara të Amerikës. Komentet e tij pasuan deklaratat e fundit të Ambasadorit të SHBA-së në Kosovë, Philip Kosnett, i cili tha se marrëdhëniet mes SHBA-së dhe Kosovës janë në pikën më të ulët të historisë së Kosovës.
Ymeri shprehu shqetësim të thellë për ndikimin që ka kjo situatë në sigurinë e Kosovës, duke e lidhur përkeqësimin e marrëdhënieve me politikën e brendshme të Qeverisë Kurti. Sipas tij, Kosova duhet të shqetësohet shumë për cenimin e sigurisë që ka sjellë kjo politikë. “Kosova po ja kthen pistoletën vetes me këtë politikë të Albin Kurtit,” tha Ymeri.
Pjesë më interesante e debatit ishte kur Ymeri komentoi marrëdhëniet e Kurtit me SHBA-në dhe qëndrimet e ambasadorit Grenell ndaj kryeministrit Kurti, sjellja e kurtit eshte “Kur gomarin e hante ujku, ai thoshte ‘Ishalla jam ender’,” tha Ymeri, duke e përdorur këtë shprehje për të ilustruar tensionet dhe pasigurinë që karakterizojnë marrëdhëniet mes Kosovës dhe SHBA-së në këtë periudhë.
Këto komente të Ymerit vijnë në një moment të rëndësishëm politik për Kosovën, ku marrëdhëniet me aleatët ndërkombëtarë janë nën presion dhe politika e brendshme po shkakton shqetësime për stabilitetin dhe sigurinë e vendit.