Një video tronditëse po qarkullon në rrjetet sociale, ku disa të rinj në fshatin Studençan të Suharekës shihen duke shkelur dhe kaluar me makinë mbi flamurin kombëtar shqiptar, të hedhur në tokë. Ky akt i paprecedent është cilësuar nga qytetarët si përdhosje e drejtpërdrejtë e simbolit më të shenjtë të kombit shqiptar – flamurit tonë kuqezi.
Videoja ka nxitur zemërim të madh në opinionin publik, ndërsa ajo që e ka shtuar indinjatën edhe më shumë është reagimi i butë i Policisë së Kosovës. Pavarësisht pamjeve të rënda dhe identifikimit të autorëve, të rinjtë janë ndaluar për pak çaste dhe më pas janë lënë të lirë, pa asnjë ndëshkim të merituar.
Zëdhënësi i Policisë për rajonin e Prizrenit, Shaqir Bytyqi, deklaroi se bëhet fjalë për dy të mitur, të cilët janë intervistuar në prani të prindërve dhe kanë pranuar se kanë bërë veprimin, duke thënë se nuk e kishin “për qëllim nënçmimin” dhe se janë penduar.
Por a mjafton një “pendesë” për të kaluar mbi flamurin kombëtar? A do të pranohej një veprim i tillë në ndonjë shtet tjetër pa pasoja ligjore dhe morale? Ku janë institucionet? Ku është drejtësia? Ku është reagimi politik?
Kjo ngjarje duhet të shërbejë si alarm i kuq për degradimin e ndjenjës kombëtare dhe mungesën e ndëshkimit për veprime të rënda që cenojnë identitetin dhe nderin e shqiptarëve. Flamuri kombëtar nuk është një copë pëlhure, por një simbol për të cilin është derdhur gjak brez pas brezi.
Të rinjtë që shkelin mbi flamur, e shkelin mbi gjithë historinë tonë.
Dhe ata që nuk reagojnë, e shkelin dinjitetin e gjithë kombit.