Vetëm dy ditë pas përplasjes shokuese të një avioni pasagjerësh me një helikopter ushtarak në Washington që i kushtoi jetën 67 personave, një tjetër tragjedi trondit SHBA.
Një avion i vogël transporti mjekësor goditi disa ndërtesa në një lagje të Filadelfias, duke djegur shtëpi e automjete e duke plagosur personat në tokë, ndërsa në bordin e tij nuk shpëtoi askush.
Në avion ndodheshin dy pilotët, një mjek e një ndihmësmjek, pacientja- një vajzë 6-vjeçare, dhe nëna e saj.
Avioni i përkiste Rescue Air Ambulance, një linjë ajrore e specializuar në transportin mjekësor.
Fëmija ishte duke marrë trajtim në SHBA për një gjendje kërcënuese për jetën dhe po kthehej në Tijuana, Meksikë, pohoi Shai Gold, një zëdhënës i linjës ajrore, për një media lokale.
Trajtimi i saj ishte sponsorizuar nga një shoqatë bamirëse.
Konsullata meksikane në Filadelfia lëshoi ??një njoftim në platformën X për shtetasit meksikanë të prekur nga incidenti për të telefonuar në një linjë ndihme.
Kryebashkiakja e Filadelfias, Cherelle Parker, u bëri thirrje banorëve që nëse shohin mbeturina, të mos i prekin, por të therrasin menjëherë 911.
Avioni ambulancë u rrëzua vetëm 30 sekonda pas ngritjes në ajër.
Aksidenti ndodhi më pak se 4.8 kilometra nga aeroporti verilindor i Filadelfias, i cili shërben kryesisht për avionët e biznesit dhe fluturimet çarter.
Avioni “Learjet 55” u zhduk nga radarët pak kohë pas ngritjes nga aeroporti në orën 18:06 dhe pasi arriti në një lartësi prej 487 metrash.
Guvernatori i Pensilvanisë, Josh Shapiro tha se ai ka ofruar të gjitha “burimet e shtetit për të reaguar ndaj ngjarjes së rëndë në Filadelfia”.