Agjencia e Kombeve të Bashkuara për fëmijë i ka bërë thirrje qeverisë në Afganistan, të udhëhequr nga talibanët, që menjëherë të heqë ndalesën e shkollimit të vajzave përtej shkollës fillore, duke thënë që nëse ndalesa vazhdon deri më 2030, më shumë se 4 milionë vajza do të privohen nga e drejta e tyre e shkollimit.
Ndalesa e Afganistanit për shkollimin e vajzave në shkollën e mesme “vazhdon të dëmtojë të ardhmen e miliona vajzave afgane”, tha shefja ekzekutive e UNICEF-it, Catherine Russell, përmes një deklarate më 22 mars. “Pasojat për këto vajza – dhe për Afganistanin – janë katastrofike”.
Apeli i UNICEF-it vjen teksa në Afganistan nis viti i ri shkollor, ku vajzave iu ndalohet të vazhdojnë shkollimin përtej klasës së gjashtë, duke i privuar nga e drejta e arsimimit, që kur talibanët u rikthyen në pushtet më 2021.
Talibanët e justifikojnë ndalesën duke thënë se shkollimi i vajzave përtej klasës së gjashtë nuk përkon me respektimin e interpretimit të tyre të Ligjit të Sheriatit.
Russell kërkoi që të gjitha vajzat të lejohen të kthehen në shkollë.
“Afganistani është vendi i vetëm në botë që ua ndalon femrave shkollimin e mesëm dhe të lartë”, tha Rusell përmes deklaratës, duke shtuar se nëse e drejta e vajzave të reja do të vazhdojë të mohohet, “pasojat do të zgjasin me gjenerata”.
Ajo theksoi se ndalesa ndikon negativisht në sistemin shëndetësor, në ekonomi dhe të ardhmen e vendit.
“Me më pak vajza që kanë arsimim, vajzat përballen me rrezik më të madh të martesave të hershme me pasoja negative për mirëqenien e tyre dhe shëndetin”, tha ajo.
Pasojat e ndalesës do të prekin një numër të mjekeve dhe mamive, dhe kjo do të lërë më shumë vajza pa përkujdesje kritike shëndetësore.
UNICEF-i parasheh 1.600 vdekje shtesë të nënave dhe mbi 3.500 vdekje të foshnjave për shkak të kësaj situate.
Talibanët kanë lejuar përjashtime të kufizuara nga ndalesa në sektorët e shëndetësisë dhe arsimit, por këto punë vijnë me kufizime të rënda dhe numri i grave në fuqinë punëtore po vazhdon të bjerë, sipas OKB-së.
Në janar, Pakistani organizoi një konferencë globale në të cilën laureatja e Çmimit Nober, Malala Yousafzai, dënoi gjendjen e të drejtave të vajzave dhe grave në Afganistan, duke e cilësuar si aparteid gjinor.
Yousafzai u bëri thirrje udhëheqësve myslimanë të mos e “legjitimojnë” qeverinë e udhëhequr nga talibanët dhe “të ngrenë zërin dhe të përdorin fuqinë e tyre” kundër kufizimeve të vendosura nga grupi militant ndaj të drejtës të shkollimit të grave dhe vajzave.
“Thënë thjesht, talibanët nuk i shohin gratë si qenie njerëzore. Ata i mbulojnë krimet e tyre me justifikime kulturore dhe fetare”, tha Yousafzai gjatë konferencës në Islamabad./REL