Një ngjarje e rëndë është raportuar si pasojë e tërmetit që ra pas mesnate në Shqipëri.
Gazetarja Anila Sefa, raporton se një 18-vjeçar nga fshati Çinar i Lushnjes ka humbur jetën pas lëkundjeve të tokës. Daniel Rika është trembur në gjumë dhe ka humbur jetën. Ai është gjetur nga të afërmit e tij i pajetë në dhomën ku qëndronte. Këtë e konfirmon për gazetarët daja i të riut. Ai pohoi për gazetaren Sefa se adoleshenti humbi jetën nga infarkti i shkaktuar nga ankthi.
“Më njoftuan pas tërmetit e kam ngritur djalin dhe për momentin djali është ngritur, është trembur dhe i ka rënë infarkt. Ka rënë në tokë, i kanë dhënë pak ndihmë, por e pamundur”, është shprehur ai.
18-vjeçari jetonte bashkë me prindërit. Sipas të njëjtave burime, i riu vuante nga probleme të spektrit autik dhe ankthit e për këta arsye kurohej.
“Prindërit janë shumë të shqetësuar, nuk janë në gjendje. Shumë tragjedi”, shtoi më tej daja.
Gazetarja Anila Sefa raporton se trupi i pajetë i të riut është dërguar në morgun e spitalit të Lushnjes ku pritet t’i ushtrohet një ekspertize mjeko-ligjore.
Tërmeti me magnitudë 4.5 të shkallës Rihter u ndje në orën 00.17 të së dielës (Lexo më shumë). Epiqendra e lëkundjeve ishte disa kilometra larg Lushnjes. Për pasojë tërmeti u ndje edhe në shumë qytete të tjera si Tiranë, Durrës, Kavajë, Fier, Korçë, Pogradec, Vlorë etj./tvklan.al