Presidenti amerikan, Donald Trump, dhe ekipi i tij do të përpiqen ta vendosin USAID-in, agjencinë për ndihmën e huaj, nën juridiksionin e Departamentit të Shtetit, çka do të thotë se kjo agjenci nuk do të ketë më autonomi për të marrë vendime të pavarura.
Sipas raportimeve të reuters, lideri i ri amerikan përveçse ka ngrirë ndihmën e huaj për 90 ditë, ka nisur të shqyrtojë nëse mund t’ia heqë USAID-it autonominë e vendimmarrjes përmes një urdhri ekzekutiv, pa miratimin e Kongresit të SHBA-së.
Ky veprim do të nënkuptonte që të gjitha vendimet e USAID-it do të duhej të miratoheshin nga Sekretari i Shtetit, Marco Rubio, dhe pjesa tjetër e ekipit që drejton këtë sektor të pushtetit ekzekutiv amerikan.
Megjithatë, çështja e statusit të USAID-it si një agjenci e pavarur mbetet e diskutueshme, duke ngritur pikëpyetje nëse 78-vjeçari mund ta ndërmarrë këtë veprim pa miratimin e organeve legjislative, përkatësisht Dhomës së Përfaqësuesve dhe Senatit të Kongresit.
Demokratët tashmë kanë paralajmëruar kundërshtim për këtë çështje, siç ka deklaruar ish-lideri i Partisë Demokratike në Senat, Chuck Schumer.
Ai e ka quajtur këtë lëvizje “antikushtetuese” dhe ka paralajmëruar se, nëse ndodh, do të ngrihen disa padi për ta sfiduar në gjykatë.
Vlen të theksohet se çdo vendim që prek USAID-in do të ketë ndikim të madh edhe në Bosnje dhe Hercegovinë, e cila çdo vit merr ndihma të konsiderueshme nga SHBA-ja, një pjesë e madhe e të cilave vijnë përmes kësaj agjencie. /Telegrafi/