Presidenti i SHBA-së, Donald Trump, ka kërkuar që Izraeli ose të përmbysë gjyqin për korrupsion të kryeministrit izraelit Benjamin Netanyahu ose t’i japë atij amnisti, duke e quajtur çështjen kundër tij “gjueti shtrigash”, raporton Al Jazeera.
Trump e bëri kërkesën e tij të ditur të mërkurën nëpërmjet platformës së tij Truth Social, duke argumentuar se Netanyahu, një aleat i ngushtë i tij, meriton trajtim të ndryshëm për shkak të kontributeve të tij në shtetin e Izraelit.
“Gjyqi i Bibi Netanyahut duhet të përmbyset menjëherë ose duhet t’i jepet amnisti këtij heroi të madh që ka bërë kaq shumë për vendin”, shkroi Trump, duke përdorur nofkën e liderit izraelit. Ai shtoi se kishte mësuar se Netanyahu do të paraqitej në gjykatë të hënën.
“Një gjueti e tillë shtrigash kundër një njeriu që ka dhënë kaq shumë është e paimagjinueshme për mua”, shtoi Trump.
Gjyqi i Netanyahut filloi në vitin 2020 për tre akuza për ryshfet, mashtrim dhe abuzim me detyrën. Netanyahu i mohon akuzat dhe është deklaruar i pafajshëm.
Sipas mediave izraelite, marrja në pyetje e Netanyahut filloi më 3 qershor në një gjykatë të Tel Avivit dhe pritet të zgjasë rreth një vit.
Presidenti izraelit Isaac Herzog ka të drejtën kushtetuese për të dhënë amnisti, por, sipas raportimeve të medias, ai tha se “në këtë kohë nuk është një opsion”, duke shtuar se “nuk është bërë asnjë kërkesë e tillë”.
Në të njëjtin postim, Trump tha: “Shtetet e Bashkuara shpëtuan Izraelin dhe tani Shtetet e Bashkuara do të shpëtojnë Bibi Netanyahun”.
Është ende e paqartë se çfarë mund të bëjnë konkretisht Trump ose qeveria amerikane për të ndaluar gjyqin e kryeministrit izraelit.
Deklarata e Trump vjen një ditë pas kritikave të tij të pazakonta publike ndaj udhëheqësit izraelit për sulmet e Izraelit ndaj Iranit menjëherë pas arritjes së armëpushimit.
“Izraeli, sapo bëmë marrëveshjen, doli dhe hodhi bomba si kurrë më parë. Ishte bombardimi më i madh që kemi parë ndonjëherë. Nuk jam i kënaqur me Izraelin”, u tha Trump gazetarëve.
Lidhur me konfliktin midis Iranit dhe Izraelit, ai tha se “ata kanë luftuar kaq gjatë dhe aq fort sa as nuk e dinë më çfarë po bëjnë”, duke përdorur fjalë të pista.