Një tjetër skandal ka tronditur sistemin shëndetësor në vend, duke ngritur pikëpyetje të mëdha mbi mungesën e kontrolleve dhe përgjegjësinë institucionale. Një person, megjithëse kishte kaluar vetëm 5 provime në Fakultetin e Mjekësisë, për tre vite ka punuar si specialist i mjekësisë familjare në një klinikë private, pa diplomë dhe pa licencë nga Oda e Mjekëve.
Më shqetësuese është fakti se kjo personë kishte arritur të regjistrohej edhe në një specializim privat, me vitin e parë të financuar nga Ministria e Shëndetësisë me 1.000 euro. Për më tepër, klinika ku ajo punonte kishte nënshkruar kontratë me Fondin e Shëndetësisë, duke shkaktuar humbje financiare dhe vënë në rrezik shëndetin e pacientëve.
Pavarësisht se Prokuroria Themelore Publike (OJO) ka hapur një procedurë hetimore, ministri i Shëndetësisë, Arben Taravari, ende nuk ka dhënë asnjë deklaratë për këtë skandal, duke rritur shqetësimet për mungesën e reformave në shëndetësinë publike.
Ky nuk është rasti i parë i një “doktorit” pa diplomë në vend. Pak kohë më parë, një rast i ngjashëm u zbulua në Gjevgjeli, ku një person arriti të punësohej si mjek anesteziolog dhe të merrte specializim shtetëror, pa pasur fare diplomë fakulteti.
Qytetarët dhe ekspertët e shëndetësisë kërkojnë masa të menjëhershme dhe përgjegjësi nga institucionet, ndërsa ministri Arben Taravari vazhdon të heshtë për këtë skandal, i cili ka tronditur besimin në shëndetësinë publike.