Pak minuta para mesnatës mbrëmë në Kuvendin e Republikës së Maqedonisë së Veriut, Trajko Sllaveski është zgjedhur guvernator i Bankës Popullore të Republikës së Maqedonisë së Veriut.
Për Sllaveskin votuan 68 deputetë “pro”, ndërsa 16 kanë qenë kundër.
Në kuadër të debatit të përgjithshëm dhe replikave dhe kundërpërgjigjeve, deputetët shprehën pikëpamje të ndryshme, ku deputetët nga pushteti u përqendruan në profesionalizmin dhe kompetencën e tij, ndërsa opozita u përqendrua në bindjen politike të Sllaveskit dhe vizionin për pavarësinë e institucionit.
Deputeti i VMRO-DPMNE-së, Bojan Stojanovski e lavdëroi Sllaveskin si një “pionier vizionar të masave që dhanë rezultate”.
“Duhet të merret parasysh edhe aktiviteti i tij ekonomik ashtu edhe ai shoqëror. Ai është një pionier vizionar i masave që kanë dhënë rezultate. Duam të diskutojmë nga perspektiva e profesionalizimit të tij, të gjitha temat tjera janë të parëndësishme”, ka thënë Stojanovski.
Elmi Aziri, deputet nga Aleanca për Shqiptarët, shprehu dyshime në lidhje me përshtatshmërinë e tij për këtë funksion, duke thënë se “fakti që profesori Sllaveski për më shumë se 25 vjet ka pasur post politik na vë në dilemë për ruajtjen e pushtetit qendror”.
Ndërkohë, deputeti Halil Snopçe nga Aleanca për Shqiptarët vlerësoi se emërimi i personave si Sllaveski i cili asnjëherë nuk fsheh bindjen politike është kërcenim për autonominë e këtij institucioni.