Një ngjarje tragjike ka tronditur futbollin algjerian mbrëmjen e së dielës, teksa festimet për titullin kampion të ekipit MC Alger janë kthyer në një katastrofë. Gjatë ceremonisë së shpërndarjes së titullit, një nga tribunat e stadiumit 5 Juillet 1962 në Algjer është shembur, duke shkaktuar vdekjen e tre tifozëve dhe lëndimin e mbi 80 të tjerëve.
Incidenti ndodhi teksa mijëra tifozë ishin mbledhur për të festuar suksesin historik të skuadrës, që rikthehet te titulli kampion pas disa vitesh. Pamjet e publikuara në rrjetet sociale tregojnë momente kaosi dhe paniku, ndërsa forcat e shpëtimit punonin për të nxjerrë të bllokuarit nga rrënojat.
Autoritetet algjeriane kanë nisur një hetim të menjëhershëm për të përcaktuar shkaqet e shembjes së tribunës, ndërsa shumë zëra kërkojnë përgjegjësi për mungesën e masave të sigurisë në një ngjarje të kësaj përmase.
MC Alger, në një deklaratë të shkurtër, ka shprehur dhimbjen dhe solidaritetin me familjet e viktimave dhe të plagosurve, duke shtuar se “kjo ditë që duhej të ishte festë, është kthyer në një ditë zie”.
Ngjarja ka tronditur opinionin publik dhe botën sportive në Algjeri dhe më gjerë, ndërsa pritet që autoritetet të marrin masa të menjëhershme për të shmangur përsëritjen e tragjedive të tilla në të ardhmen.