Gëzim Kadriu jep dorëheqje: “U përjashtuam nga qeverisja lokale”
Gëzim Kadriu, nënkryetar i Aleancës për Shqiptarët, ka dhënë dorëheqje të parevokueshme nga posti i drejtorit të Ndërmarrjes Publike “Tregjet” në Kumanovë, përkundër se kontrata e tij menaxheriale ishte e vlefshme deri në nëntor 2027.
Kadriu deklaron se gjatë mandatit të tij ka vepruar me transparencë dhe kursime të mëdha buxhetore, duke hequr dorë nga beneficionet personale dhe duke orientuar mbi 5 milionë denarë drejt projekteve për qytetarët. Ai shprehet krenar për përfaqësimin e shqiptarëve në komunë.
Megjithatë, ai thekson se dorëheqja vjen si pasojë e zhvillimeve politike që çuan në përjashtimin e Aleancës për Shqiptarët nga bashkëqeverisja lokale në Kumanovë. Sipas tij, pas ndryshimeve në nivel qendror dhe kalimit të një këshilltare shqiptare në një parti tjetër, kryetari Maksim Dimitrievski nuk kishte më nevojë për bashkëpunimin me ASH-në dhe bllokoi projektet për shqiptarët.
“Kur t’i lodh kërkesat për shqiptarët, atëherë nuk ka më bashkëpunim”, u shpreh Kadriu, duke bërë thirrje për bashkim të shqiptarëve në zgjedhjet lokale të ardhshme.