Kryetari aktual i Komunës së Butelit, Darko Kostovski, ka reaguar ashpër pas një hutbeje të mbajtur në xhaminë e Butelit 2 nga hoxhë Bedri Lika, ku, sipas Kostovskit, është bërë një thirrje politike që shqiptarët të mos e votojnë atë, për shkak të përkatësisë së tij etnike si maqedonas.
Në reagimin e tij publik, Kostovski e ka cilësuar këtë veprim si të papranueshëm dhe si përdorim të fesë për qëllime politike.
“Hoxhë, në hutben e ditës së sotme të xhumasë, është dashur të predikosh atë që mëson Islami si fe, dhe jo të thuash që shqiptarët nuk duhet të votojnë për Darko Kostovskin vetëm sepse është maqedonas. Madje the që më mirë të votojnë për BDI-në”, ka deklaruar ai.
Kostovski ka listuar disa nga projektet që, sipas tij, janë realizuar për të gjithë qytetarët e komunës, pa dallim etnie:
Ndërtimi i një çerdheje të re në Butel 2
Fasadë e re për shkollën “Panajot Ginovski”
Furnizimi me ujë të pastër për banorët e Lubotenit
Shkollë e re në Vizbeg
Investime mbi 1 milion euro në infrastrukturë në Shkupin e Veriut
Fillimi i ndërtimit të një poliklinike të re para Vitit të Ri
Kostovski theksoi se qytetarët, përfshirë shqiptarët, do ta ndëshkojnë me votë këtë lloj sjelljeje politike të mbështetur në përçarje etnike.
“Populli do zhvillim dhe projekte, jo thirrje për të mos votuar për një kandidat për shkak të kombësisë së tij”, përfundoi ai.