Gazetari investigativ Marin Mema ka reaguar ashpër ndaj thirrjeve antishqiptare të bërtitura gjatë një ndeshjeje basketbolli në Kumanovë, duke kërkuar një qëndrim zyrtar dhe të prerë nga shteti shqiptar. Sipas Memës, ajo që ndodhi nuk është thjesht një incident sportiv, por shfaqje e rrezikshme e një fryme ekstreme dhe përjashtuese, që kërcënon bashkëjetesën dhe stabilitetin në Maqedoninë e Veriut.
“Shteti shqiptar duhet të reagojë zyrtarisht! Nuk mund të heshtet përballë thirrjeve ‘vdekje shqiptarëve’, aq më tepër kur ato ndodhin në praninë e krerëve më të lartë të Maqedonisë së Veriut,” shkruan Mema.
Ai thekson se shqiptarët janë autoktonë dhe shtetformues në Maqedoninë e Veriut dhe se heshtja përballë urrejtjes vetëm sa ushqen klimën e rrezikut. “Heshtja sjell përsëritje, përsëritja sjell kthesa të rrezikshme. Kjo nuk është çështje emocioni, por stabiliteti dhe të ardhmeje,” shprehet ai.
Mema kërkon që autoritetet shqiptare t’i bëjnë të qartë qeverisë së Maqedonisë së Veriut se nuk ka Europë, nuk ka bashkëjetesë dhe nuk ka stabilitet pa shqiptarët.