Në një ngjarje për arsimin të mbajtur në Tetovë, qytetin ku shumica e nxënësve mësojnë në gjuhën shqipe, ministrja e Arsimit, Vesna Janevska, duket se pati vështirësi të përshtatej me realitetin gjuhësor të vendit ku ndodhej. Ngjarja dedikuar arsimit, për pak u shndërrua në një leksion mbi tolerancën gjuhësore. Ajo që ra në sy, ishte sjellja e ministres gjatë konferencës për mediat, e cila krijoi përshtypjen e një diskomforti përballë gjuhës shqipe. Teksa kryetari i Tetovës, Bilall Kasami, u përgjigjej pyetjeve të gazetarëve në shqip, ministrja disa herë e ndërpreu për të kërkuar që komunikimi të ishte “më i shkurtër” ose të bëheshin “përkthime në maqedonisht”, pasi siç tha, duhet ta kuptojnë edhe ata që “nuk e dinë shqipen”.
“Ju lutem nëse mundet në gjuhën maqedonase, ju lutem ka mësimdhënës… Më falni kryetar ju lutem shkurt vetëm, që të kuptojmë edhe ne që nuk dimë mirë shqip”, tha Vesna Janevska.
Janevska: Më falni shkurtimisht na tregoni vetëm se çfarë folët, ju lutem, ju lutem.
Kasami: Ta përfundoj në shqip dhe do ta them të gjithën në maqedonisht.
Janevska: Ah mirë, në rregull faleminderit.
Por situata nuk ishte e njëjtë kur ajo u përgjigjej pyetjeve në maqedonisht, ku pa asnjë ndërprerje foli lidhur me çështjen e librave, duke thënë se tashmë ishte një çështje e mbyllur. Për mungesën e librave që u paraqit këtë vit, fajin e hodhi te drejtorët e shkollave.
“Librat janë një problem i zgjidhur, unë vërtetë mendoj se kjo temë duhet të mbyllet, janë siguruar mjete, janë siguruar programe të reja mësimore, po shtypen libra të rinj, por ajo që mungon në shoqërinë tonë, është lidhja e mirë mes institucioneve dhe funksionimi i institucioneve. Shkollat janë pjesë e sistemit, drejtorët e shkollave janë po ashtu pjesë e sistemit. Ata duhet njësoj si ministria, byroja, dhe të gjitha institucionet tjera që tashmë shumë seriozisht e marrin punën, ashtu njësoj edhe menaxherët e shkollave do të duhet shumë seriozisht ta marrin punën. Këtë vit, lirisht do të them se shikova mes gishtave, vitin e ardhshëm nuk do të shikojmë përmes gishtave”, tha Vesna Janevska, Ministre e Arsimit.
Kasami poashtu tha se sigurimi i librave duhet të bëhet sipas ligjit dhe secili duhet ta bëjë punën që e ka të përcaktuar me ligj.
“Sa i përket librave që bazohet në ligj, ne vitin e kaluar kemi siguruar të gjitha librat në shkollat fillore, aty ku ka pasur tekste shkollore dhe siç tha edhe ministrja se nga viti i ardhshëm, i gjithë procesi duke nisur nga përkujdesja që fëmijët duhet ta kenë për librin, shkollat, drejtoritë e shkollave deri te komuna dhe ministria që të mos mungojnë librat”, u shpreh Bilall Kasami, Kryetar i Komunës së Tetovës.
Këto komente u bënë para Panel diskutimit në Tetovë me titullin “Dija është e vetmja magji.” /Alsat.mk