Populli i Kosovës dhe ai i Sirisë janë dy popuj që ndajnë plagë të thella historike — vuajtje të panumërta nga regjime diktatoriale e gjenocidale, si dhe përpjekje të vazhdueshme për liri dhe dinjitet.
Në një takim të parë zyrtar, Presidentja e Republikës së Kosovës mirëpriti Presidentin e Sirisë së lirë, z. Ahmed al Sharaa, për të hapur kapituj të rinj bashkëpunimi ndërmjet dy vendeve tona.
Kosova dhe Siria ndajnë histori të ngjashme të dhimbjes nga lufta, shpërnguljes së detyruar dhe sfidave të mëdha të rindërtimit pas konfliktit. Në këtë frymë solidariteti, Kosova shpreh gatishmërinë për të ndarë përvojën e saj në ndërtimin e institucioneve demokratike dhe konsolidimin e shtetit të së drejtës.
Ky takim simbolizon një hap të rëndësishëm drejt forcimit të marrëdhënieve ndërmjet dy popujve që kanë luftuar për liri dhe drejtësi.