Përplasjet në ASH: Rashidi reagon ndaj lëvizjeve të papritura të Taravarit
Një status i postuar nga Syrija Rashidi, ish-deputet i Aleancës për Shqiptarët (ASH), ka nxitur reagime në rrjetet sociale dhe interpretohet si shenjë pakënaqësie ndaj zhvillimeve të fundit brenda partisë.
Rashidi, përmes një storie në Facebook, ironizoi lëvizjet e papritura të ASH-së, duke i quajtur një “mister” që po prezantohet si diçka që do të sjellë një të mirë të madhe. “Ndërsa e ‘mira’ më e madhe që mund të ndodhë,” shkruan ai, “është që të rikthejë Ali Ahmetin në kalë të bardhë.”
Ky reagim vjen në një kohë kur në opinion po qarkullojnë zëra për një bashkëpunim të mundshëm të kryetarit të ASH-së, Arben Taravari, me BDI-në – partinë që ASH e ka kritikuar ashpër për vite me radhë, së bashku me aktivistët e saj.
Rashidi, i cili ka qenë deputet i ASH-së në mandatin e kaluar, nuk është i vetmi që ka shprehur pakënaqësi për drejtimin e ri që mund të marrë partia. Reagimi i tij shton dyshimet për një ndarje të brendshme mes strukturave dhe krahëve të ndryshëm brenda partisë, veçanërisht mes atyre që e kanë ndërtuar identitetin politik të ASH-së mbi kundërshtimin ndaj BDI-së dhe çdo forme bashkëpunimi me të.
Situata mbetet e tensionuar dhe pritet me interes çdo hap i ardhshëm nga drejtuesit e ASH-së, në një moment vendimtar për pozicionimin e partive shqiptare në prag të zgjedhjeve lokale të vjeshtës