Sipas burimeve të brendshme brenda koalicionit VLEN, në rast të fitores në raundin e dytë të zgjedhjeve lokale në Strugë, VMRO-DPMNE do të marrë 60% të pozitave në Komunë, në proporcion me votat që kjo parti ka siguruar në raundin e parë.
Të njëjtat burime theksojnë se ky është një marrëveshje e brendshme politike mes përfaqësuesve të VLEN-it dhe VMRO-së, bazuar në rezultatin e raundit të parë të zgjedhjeve, ku kandidati i “pavarur” Mendi Qyra ka marrë mbi 5.000 vota nga elektorati i VMRO-së.
Ky zhvillim, sipas burimeve, ka shkaktuar pakënaqësi dhe revoltë mes shumë aktivistëve të VLEN-it në Strugë, të cilët ndihen të mashtruar nga mënyra se si po menaxhohet marrëdhënia politike me VMRO-në.
“Kjo marrëveshje e fshehtë tregon qartë se kandidati i ashtuquajtur ‘i pavarur’ është në fakt kandidat i VMRO-së në Strugë,” – tha për portalin tonë një eksponent politik i VLEN-it që ka kërkuar të mbetet anonim.
Sipas tij, përpjekjet e VLEN-it për ta paraqitur Mendi Qyrën si kandidat të pavarur janë “kamuflim politik” me qëllim për të fshehur ndikimin e drejtpërdrejtë të VMRO-së në fushatën lokale.
“Të gjitha sinjalet tregojnë se pushteti në Strugë, në rast të fitores së Mendi Qyrës, do të ndahet në mënyrë proporcionale, me 60% për VMRO-në dhe 40% për VLEN-in. Kjo është marrëveshje politike, jo kandidaturë e pavarur,” – shton burimi.