Qindra policë janë vënë në kërkim të 14-vjeçares Vanja Gjorçevska dhe po ndërmerren aktivitete të gjera, tha sot ministri i Punëve të Brendshme, Oliver Spasovski, në ditën e pestë të kërkimit për vajzën e cila u zhduk të hënën, rrugës për në shkollë.
Në një deklaratë për media të dhënë pas vizitës në SPB-Shkup, Spasovski tha se janë intervistuar dhjetëra persona dhe se janë duke u ekzaminuar pajisjet elektronike nga familja dhe vajza. Ai tha se nuk mund të ndajë informacione për vajzën e zhdukur, por mund të thotë se çfarë ka bërë policia deri më tani.
“Është kontrolluar edhe shtrati i lumit Vardar, kontrollohen të gjitha hapësirat nëntokësore, jo vetëm në rrethinë, por edhe më gjerë. Jemi duke punuar edhe në marrjen e të dhënave nga kishat dhe manastiret në rrethinën e Shkupit dhe nuk do të ndalemi me kaq, po punohet intensivisht”, tha Spasovski.