Dy eurodeputetë bullgarë, Stanislav Stojanov nga “Prerodba” dhe Ivajlo Valchev nga “ITN”, kanë ngritur alarmin për një skandal të mundshëm të rrjedhjes së dokumenteve konfidenciale në Parlamentin Evropian.
Në një letër zyrtare drejtuar Komitetit për Punë të Jashtme (AFET), ata shprehin shqetësimin e tyre për parregullsi serioze që, sipas tyre, kanë shoqëruar procesin e negociatave për anëtarësimin e Maqedonisë së Veriut në Bashkimin Evropian.
Sipas tyre, Kryeministri i Maqedonisë së Veriut, Hristijan Mickoski, ka pasur qasje në elementë të caktuar të Draft-Raportit të Progresit dhe në amendamentet e kompromisit, përpara se ato t’i viheshin në dispozicion vetë eurodeputetëve. “Gjatë takimit të parë të raportuesve në hije, u bë e qartë se përfaqësuesit maqedonas ishin të informuar për detaje që nuk ishin publike”, thuhet në letër.
Ata theksojnë një rast konkret ku një nga raportuesit në hije dërgoi një email teknik dhe konfidencial për të sqaruar një çështje – një mesazh që brenda 24 orëve u reflektua në deklaratat publike të Mickoskit. Kjo, sipas tyre, është dëshmi e qartë për një rrjedhje të brendshme të informacionit ose një cenim të sigurisë IT në institucionet e BE-së.
Eurodeputetët bullgarë kërkojnë hetim urgjent mbi këtë çështje dhe shprehin shqetësim të madh për ndikimin që mund të ketë kjo situatë në besueshmërinë dhe integritetin e procesit të zgjerimit të BE-së.