Të punësuarit në Inspektoratin për Zbatimin e Gjuhëve kanë ngritur shqetësime serioze lidhur me funksionimin e këtij institucioni. Sipas deklarimeve të një inspektori, që nga muaji mars nuk ekziston asnjë plan për realizimin e inspektimeve në terren, çka përbën një paralizim praktik të punës së institucionit.
“Prej katër vitesh, inspektimet i kemi realizuar me veturat tona personale, sepse institucioni posedon vetëm një veturë zyrtare, të cilën e shfrytëzon ekskluzivisht drejtori,” ka theksuar një nga inspektorët.
Kjo situatë jo vetëm që e vështirëson ushtrimin e detyrës nga ana e inspektorëve, por edhe tregon për një menaxhim të dobët institucional, duke lënë pas dore një mision të rëndësishëm siç është zbatimi i ligjit për përdorimin e gjuhëve.
Shumë qytetarë dhe institucione presin nga ky inspektorat të garantojë barazi gjuhësore dhe respektim të ligjit, por aktualisht duket se mungesa e resurseve dhe vullnetit po e kthen këtë institucion në një strukturë jofunksionale.
Kërkohet urgjentisht ndërhyrje nga organet përkatëse dhe përgjegjësi nga udhëheqësia për të garantuar funksionimin normal të inspektoratit dhe për të ndalur abuzimet me resurset shtetërore.