Largimi i papritur i Dolces nga shtëpia e Big Brother VIP Kosova ka sjellë një stuhi emocionesh, veçanërisht për Edin, banorin që kishte krijuar raportin më të afërt me të.
Ndërsa banorët brenda shtëpisë janë plotësisht të bindur se Dolce është larguar për arsye urgjente familjare, publiku jashtë e di tashmë të vërtetën: bukuroshja është nisur drejt Italisë për një aventurë njëjavore në “Grande Fratello”, versionin italian të formatit.
Kjo e vërtetë e fshehur ua ka vështirësuar ditën banorëve, por më së shumti Edit. Konkurrenti, i njohur nga sezoni i kaluar për lojën e fortë dhe shpesh agresive, këtë herë është shfaqur krejt ndryshe: i ndjeshëm, i lënduar dhe emocionalisht i rrënuar.
Në mëngjesin e së shtunës, kamerat e shtëpisë e kanë kapur Edin të përlotur në zonën e lavanderisë. Në një moment dobësie, ai ka marrë një laps – që dyshohet të jetë laps grimi – dhe ka shkruar një mesazh në letër për Dolcen: “Më mungon shumë. Pritëm jashtë”.
Ky dedikim i shkurtër, por i ngarkuar emocionalisht, është bërë menjëherë viral në rrjete sociale. Por, reagimet e publikut kanë qenë të përziera dhe kryesisht ironizuese. Ndërsa një pjesë e vogël e ndjekësve e shohin këtë si një kthesë të madhe të Edit drejt një karakteri më të butë, shumica nuk janë bindur aspak.