Fushata zgjedhore në Strugë nisi me një ngjarje që më shumë ngjalli kureshtje sesa entuziazëm. Koalicioni VLEN hapi zyrtarisht shtabin zgjedhor për zgjedhjet lokale të vitit 2025, duke shpallur publikisht mbështetjen për Mendi Qyrën si kandidat të pavarur për kryetar të komunës. Lëvizje që shumëkush nuk e priste, sidomos për shkak të profilit të distancuar politik të vetë Qyrës.
Por ajo që vërtet i la të gjithë me sy hapur ishte mungesa e vetë kandidatit në ceremoninë e hapjes. Në vend që të përshëndeste përkrahësit e tij dhe të pranishmit, Mendi Qyra zgjodhi të mos paraqitej fare. Në një ngjarje që pritej të ishte spektakolare për nisjen e fushatës, kandidati kryesor mungoi pa asnjë shpjegim publik.
Ky “bojkot” i papritur nga ana e Qyrës ka hedhur hije dyshimi mbi marrëveshjen e shpallur dhe ka ngjallur spekulime të forta në opinionin publik. A ka mosmarrëveshje mes tij dhe VLEN-it? A është kjo përkrahje e njëanshme? Apo kemi të bëjmë me një strategji të fshehtë politike që ende nuk është bërë publike?
Pa praninë e kandidatit në nisjen e fushatës, VLEN duket se ka hyrë në garë me më shumë pikëpyetje sesa përgjigje. Struga pret sqarime, ndërsa fushata ka nisur me tone të turbullta dhe me një protagonist që… mungon!