Kreu i Aleancës për Shqiptarët, Ziadin Sela, ka reaguar me tone të forta pas thirrjeve skandaloze kundër shqiptarëve të dëgjuara në Kumanovë, gjatë një ndeshjeje basketbolli. Për Selën, këto nuk janë episode të izoluara, por kulmi i një politike të gjatë urrejtjeje, diskriminimi dhe përpjekjesh për “deshqiptarizimin” e Maqedonisë së Veriut.
“Nuk filluan mbrëmë, por mbrëmë kulmuan. Thirrjet ‘dhomat e gazit’ dhe ‘vdekje shqiptarëve’ janë vazhdimësi e fushatës së ‘Makedonija povtorno tvoja’ dhe e përpjekjeve për të fshirë gjithçka shqiptare nga shteti,” u shpreh Sela.
Ai nuk kurseu kritikat për ata që, sipas tij, janë shqiptarë vetëm me pasaportë, por jo me dinjitet. “Këto janë pasojë e shqiptarëve ‘të ndershëm’ që u zgjodhën dhe u akomoduan në pushtet vitin e kaluar, dhe sot relativizojnë gjithçka me deklarata boshe në Facebook.”
Sela bëri thirrje për reflektim dhe mobilizim serioz politik e qytetar. “S’kemi më luksin të reagojmë vetëm me fjalë. Është koha të punojmë, të flasim me njëri-tjetrin, të organizohemi dhe në fund të këtij viti t’i japim fund këtij turpi institucional.”
Ai përfundoi me një mesazh të qartë për ata që heshtin përballë urrejtjes:
“Turpi le t’u mbetet atyre që dëgjojnë në heshtje. Lavdia qoftë mbi ju që nuk do rrini duarkryq, por do i bashkoheni rezistencës për rikthimin e dinjitetit shqiptar.”