Skuadra tetovare e Shkëndijës ka bërë një lëvizje të rëndësishme në merkaton e dimrit, duke siguruar shërbimet e sulmuesit anësor Fabrice Tamba, njofton Telegrafi.
Kuqezinjtë jo vetëm që kanë përforcuar ekipin e tyre, por gjithashtu kanë dobësuar një rival direkt si Shkupi, nga ku senegalezi 21-vjeçar është transferuar në Tetovë.
Tamba iu bashkua Shkupit verën e kaluar dhe gjatë qëndrimit të tij në Ligën e Parë të Maqedonisë së Veriut zhvilloi 12 ndeshje, duke realizuar tre gola dhe duke asistuar një herë. Tashmë, ai do të përpiqet të ndihmojë Shkëndijën në garën për titullin kampion në pjesën e mbetur të sezonit.
Futbollisti i ri e nisi karrierën e tij në Portugali, duke luajtur për skuadrat Covilha dhe Beira Mar, ndërsa më pas kaloi te ekipi B i Bragës para se të transferohej në Shkup. Me këtë lëvizje, Shkëndija konfirmon ambiciet e saj për të qenë pretendente kryesore në kampionat, duke forcuar repartin ofensiv me një talent premtues. /Telegrafi/