Marrëveshja për Rrugën drejt Normalizimit të Marrëdhënieve mes Kosovës dhe Serbisë, e arritur në shkurt 2023 me ndërmjetësimin e Bashkimit Evropian, konsiderohet një hap pozitiv dhe Shtetet e Bashkuara të Amerikës nxitin zbatimin e saj të shpejtë, sipas Aktit për Autorizimin e Mbrojtjes Kombëtare të miratuar nga Kongresi dhe nënshkruar nga presidenti Donald Trump më 18 dhjetor.
Akti thekson se, pasi të arrihet përparim i mjaftueshëm, Shtetet e Bashkuara do të shqyrtojnë nisma për forcimin e marrëdhënieve bilaterale me të dy vendet, përfshirë dialogun strategjik dhe projektet për zgjerimin e bashkëpunimit ekonomik.
Sipas aktit, SHBA-ja mbështet një marrëveshje gjithëpërfshirëse përfundimtare mes Kosovës dhe Serbisë, e bazuar në njohje të ndërsjellë, pa shkëmbime territoriale apo ndryshime kufijsh sipas linjave etnike. Po ashtu, nxit demokratizimin dhe parandalimin e rikthimit të konflikteve etnike në rajon.
Marrëveshja, e njohur si Marrëveshja e Brukseli/Ohrit, përfshin 11 nene që parashikojnë vetëmenaxhim për komunitetin serb në Kosovë, njohje të simboleve shtetërore, mosbllokimin e anëtarësimit të Kosovës në organizata ndërkombëtare nga Serbia, si dhe detyrimin e të dy palëve për të zbatuar të gjitha marrëveshjet e mëparshme gjatë dialogut.
Akti i Autorizimit të Mbrojtjes Kombëtare (National Defense Authorization Act), autorizon më shumë se 901 miliardë dollarë për programet e mbrojtjes dhe përfshin edhe Kosovën.
Ky ligj pasqyron rëndësinë që Shtëpia e Bardhë dhe Kongresi i Shteteve të Bashkuara i kushtojnë sigurisë së Kosovës dhe stabilitetit të Ballkanit Perëndimor.
Akti i Autorizmit të Mbrojtjes Kombëtare përmban disa mesazhe si paqja, stabiliteti dhe se e ardhmja demokratike e Kosovës janë interes strategjik i Shteteve të Bashkuara të Amerikës.
Akti mbështet gjithashtu zgjerimin e NATO-s në Ballkanin Perëndimor, duke përfshirë edhe perspektivën e anëtarësimit të Kosovës në Aleancë, si dhe anëtarësimin në BE.
Në Ligj parashikohet mbështetje e vazhdueshme për reformat demokratike dhe sundimin e ligjit në Ballkanin Perëndimor, zhvillimin ekonomik, rritjen e investimeve dhe forcimin e institucioneve. Kosova po ashtu përfshihet në kuadrin rajonal të masave për monitorimin dhe kundërshtimin e ndikimit malinj rus dhe kinez në Ballkanin Perëndimor. Ligji mbështet rritjen e ndihmës amerikane për sigurinë kibernetike, nga e cila përfiton edhe Kosova.