Presidenti i përkohshëm i Sirisë, Ahmed al-Sharaa, u zotua të hënën se personat e përfshirë në sulmin “e neveritshëm” vetëvrasës ndaj një kishe në Damask një ditë më parë do të ballafaqohen me drejtësinë, duke bërë thirrje për unitet në vend.
Të shtënat dhe shpërthimi vetëvrasës të dielën në kishën e distriktit Dwelaa në kryeqytetin sirian la 25 njerëz të vrarë e 63 të tjerë të plagosur, tha Ministria e Shëndetësisë, e cila fillimisht kishte raportuar për 22 të vdekur.
Autoritetet kanë thënë se sulmuesi ishte i lidhur me grupin ISIS, raporton mediumi “France24”.
“Ne premtojmë… se do të punojmë natë e ditë, duke i mobilizuar të gjitha agjencitë tona të specializuara të sigurisë, për t’i kapur ata që morën pjesë dhe që e planifikuan këtë krim të neveritshëm dhe për t’i sjellë ata para drejtësisë” – tha Sharaa në një deklaratë.
Ky sulm “na e kujton rëndësinë e solidaritetit dhe unitetit të qeverisë dhe të popullit gjatë ballafaqimit me të gjitha ato që i rrezikojnë sigurinë dhe stabilitetin e vendit tonë” – shtoi ai.
Sulmi i parë i këtij lloji në kryeqytetin sirian që nga ardhja në pushtet e rebelëve në dhjetor u dënua edhe nga komuniteti ndërkombëtar.
Ky ishte gjithashtu sulmi i parë brenda një kishe në Siri që nga shpërthimi i luftës civile në vend në vitin 2011, sipas një vëzhguesi, në shtetin ku siguria mbetet njëra nga sfidat më të mëdha për autoritetet e reja.
Që nga ardhja në pushtet e autoriteteve të reja, komuniteti ndërkombëtar në mënyrë të përsëritur i ka bërë thirrje qeverisë siriane që t’i mbrojë pakicat dhe ta garantojë pjesëmarrjen e tyre në tranzicionin e vendit, sidomos pas dhunës sektare muajve të fundit.