Analisti politik Sefer Selimi ka reaguar me tone kritike ndaj qasjes së kryeministrit të RMV-së, Hristijan Mickoski, duke e cilësuar sjelljen e tij politike si “një formë të re të disciplinimit parandalues të shqiptarëve në qeveri”.
Sipas Selimit, pas zgjedhjeve lokale, Mickoski ka filluar t’i “disiplinojë” paraprakisht partnerët shqiptarë të koalicionit, në mënyrë që të mos lejojë rritjen e pritshmërive dhe të paralizojë çdo guxim politik eventual nga ana e tyre. Ai thekson se kjo metodë funksionon që në start, pasi shqiptarët në pushtet kalojnë direkt në fazën e justifikimeve dhe relativizimeve të vendimeve të qeverisë.
“Disiplinimi nuk vjen më si reagim ndaj një gabimi, por si parandalim i guximit eventual,” shkruan Selimi, duke shtuar se modeli i vjetër i “disiplinimit reaktiv” ende ekziston dhe manifestohet me kallëzime policore edhe pas kërkimfaljeve publike.
Selimi e mbyll reagimin me ironi, duke lënë të kuptohet se ky cikël politik është kthyer në normalitet për përfaqësuesit shqiptarë në qeveri.