Aleanca për Shqiptarët ka reaguar ashpër ndaj variantit të ri të ligjit për përfaqësim të drejtë dhe adekuat, i cili u prezantua sot nga kryeministri dhe zëvendësit e tij shqiptarë. Sipas kësaj force politike, propozimi në fjalë nuk është zgjidhje e problemit të përfaqësimit, por një devijim dhe tentativë për të anashkaluar thelbin e së drejtës kushtetuese.
“Ky variant nuk është zgjidhje ligjore për të drejtën kushtetuese për përfaqësim të drejtë dhe adekuat, por është shmangie dhe devijim i qëllimshëm sipas konceptit të VMRO-së, që kërkon ta bëjë këtë të drejtë të pazbatueshme”, thuhet në reagimin e Aleancës.
Sipas tyre, ligji ka vetëm dy nene që trajtojnë përfaqësimin, dhe as aty nuk ofrohet një mekanizëm i qartë për zbatimin real të përfaqësimit të drejtë. Madje, kritikohen edhe dispozitat që lejojnë ndryshimin e përkatësisë etnike me një deklaratë noteriale, praktikë që sipas Aleancës, përforcon keqpërdorimet dhe e zbeh kuptimin e balancuesit.
“Ky propozim nuk kalon! Nuk është kauza e Aleancës për Shqiptarët. Është kauza e ‘Arbenave’, që për pushtet po shesin ardhmërinë e të rinjve, të drejtën për punë dhe jetë në tokën e të parëve”, përfundon reagimi.
Aleanca për Shqiptarët kishte shpjeguar që më herët kauzën e saj për përfaqësim të drejtë para elektoratit, me objektiva të qarta dhe mekanizma konkretë për zbatim, duke e cilësuar propozimin e sotëm si “teatër politik” dhe përpjekje për të dhënë një legjitimitet të rremë shqiptar në një proces të deformuar.