Kryetari i Aleancës për Shqiptarët, Ziadin Sela, ka dërguar një mesazh të qartë dhe të drejtpërdrejtë për deputetët e partisë së tij gjatë një interviste televizive. Ai theksoi se ka qenë gjithmonë i hapur dhe i përkushtuar për t’u ofruar mbështetje dhe sqarime politike deputetëve të partisë, pavarësisht zhvillimeve të fundit që kanë shkaktuar përçarje.
“Me këtë pyetje, po e shfrytëzoj rastin t’u drejtohem deputetëve. Unë jam i hapur për ta, ata e dinë se gjithmonë i kam respektuar shumë…”, tha Sela, duke shtuar se disa prej tyre mund të kenë besuar në informacione të rreme, por se tashmë është koha për t’u rikthyer dhe për të qëndruar të bashkuar si pjesë e Aleancës.
Ai shprehu keqardhje për faktin që, në momente të caktuara, deputetët janë lënë pa mbështetje përballë kryeministrit dhe janë detyruar të heshtin. “Për fat të keq, janë detyruar të heshtin, sepse nuk kishin askënd që të qëndronte pas tyre për t’i mbrojtur”, tha ai.
Sela përmbylli me një thirrje krenare: “Është koha të kthehen dhe të jenë ajo që janë – deputetë të Aleancës për Shqiptarët”.