Kryeministri i Kosovës, Albin Kurti, sot përgëzoi koalicionin VLEN për rezultatet në zgjedhjet lokale në Maqedoninë e Veriut, duke e quajtur qeverisjen e tyre “një dallim etik” nga qeveritë e kaluara. Por reagimi nuk vonoi. Aktivisti politik dhe analisti Sefer Selimi i është përgjigjur ashpër, duke listuar një sërë zhvillimesh që, sipas tij, e rrëzojnë komplet narrativën e Kryeministrit.
Selimi përmendi hyrjen e AltaBank të David Macura-s në tregun financiar, depërtimin e kompanive serbe si Mtel dhe marrëveshjet e shumta energjetike me Serbinë. Ai akuzoi qeverinë për festime me protokoll shtetëror të ditëve të pushtimit serb, përpjekje për të relativizuar gjuhën shqipe në institucionet shtetërore, pabarazi etnike në punësimet publike dhe konstatimet e institucioneve ndërkombëtare për rrëshqitjen e Maqedonisë së Veriut drejt konceptit të “Botës Serbe”.
“Po, ka dallim etik, ndërkaq për punën e korrupsionit po ju lëmë të silleni si Liza në botën e çudirave”, shkroi Selimi, duke mbyllur reagimin me ironi të fortë ndaj deklaratave të Kurtit.
Replika e tij ka ndezur debat në rrjetet sociale, ndërsa asnjë reagim i ri zyrtar nga VLEN apo zyrtarë të Maqedonisë së Veriut nuk është dhënë deri tani.