Salim Sulejmani, dje në seancën qeveritare të RMV-së është emëruar si i dërguar special i vendit për vendet arabe, transmeton Portalb.mk.
“Të emërohet Salim Sulejmani si i dërguar special i Qeverisë së Republikës së Maqedonisë së Veriut për vendet e Gjirit Persik”, thuhet në vendimin e Qeverisë.
Salimi, më 18 maj dha dorëheqje nga të gjitha funksionet partiake të ASH-së dhe nga pozita e deputetit në Kuvendin e RMV-së.
Nga ana tjetër Taravari a reaguar duke thën se informacionet e tyre për pazare nate, shantazhe dhe transfere interesi rezultuan të jenë tërësisht të sakta.
“Me ngut, në seancën e fundit të Qeverisë së VMRO-DPMNE dhe VLEN-it, ish-deputeti Salim Sulejmani u emërua si i dërguar special në Arabinë Saudite – dhe jo si ambasador i plotfuqishëm, siç ishte pritur nga ai dhe mbështetësit e tij. Ky është një nënçmim i drejtpërdrejtë, i cili vetëm sa e konfirmon natyrën e pazarit të ulët politik, në këmbim të dorëzimit të mandatit të deputetit”, thotë Taravari.
Një tjetër skenar i paralajmëruar sipas tij, po bëhet realitet, e ajo është: Azir Aliu po emërohet Ministër i Shëndetësisë – “një tjetër post personal që blen heshtje dhe tradhti ndaj vullnetit të qytetarëve shqiptarë”.
“Këto emërime, së bashku me zhvillimet që priten në ditët në vijim, janë dëshmi e qartë se grupi i Arben Fetait është instrument qeveritar, i joshur me privilegje dhe kolltukë, i cili ka vetëm një mision: të dëmtojë Aleancën për Shqiptarët dhe të tradhtojë interesin qytetar shqiptar. Por koha i zbulon të gjithë! Fytyra e vërtetë e komplotistëve të mbështetur nga qeveria po del në shesh. Ata po izolohen përditë nga qytetari shqiptar, i cili i njeh tashmë dallimet mes idealeve të pastra të ASH-së dhe interesave personale të kolaboracionistëve politikë”, thuhet në reagim.