Që nga muaji mars, paga minimale në Maqedoninë e Veriut do të jetë 22.500 denarë, shkruan TV21. Ministri i Ekonomisë, Kreshnik Bekteshi thotë se kjo është rezultat i mungesës së fuqisë punëtore, por edhe i metodologjisë që Qeveria e miratoi për pagën mesatare, që automatikisht shkakton rritje të pagës minimale.
“Ne jemi në kontakt të vazhdueshëm me odat ekonomike dhe kjo është shumë me rëndësi për shkak se tashmë ka mungesë të fuqisë punëtore në vendin tonë dhe tashmë automatikisht rriten pagat, përveç kësaj, kjo del nga metodologjia që e miratuam vitin e kaluar në pjesën e inflacionit dhe në pjesën e rritjes së pagës mesatare, që automatikisht duhet të rritet paga minimale, por nuk do të ndalemi këtu. Ne plotësisht jemi të përkushtuar në rritjen e standardit të jetesës së qytetarëve tanë, kurse paralelisht me këtë, gjithsesi edhe rritjen e produktivitetit të të punësuarve në shtetin tonë, që kompanitë të jenë më konkurruese”, tha Bekteshi.