Reagimi i një grupi pleqësh të rrjedhur nga Lidhja e Luftëtarëve Antifashist të Tetovës, të cilët shprehën kundërshtimin e tyre përmes një letër të hapur për kryekomunarin Kasami se nuk do të lejojnë ndryshimin e emrave të rrugëve të partizanëve maqedonë dhe zëvendësimin e tyre me emra të nacionalistëve shqiptarë, u duk më shumë si diskurs neofashist i një grushti pleqësh pseudofashistë që mezi qëndrojnë në këmbë.
Duket qartë se ata në kilometrat e tyre të fundit të jetës duan të ruajnë privilegjet për pasardhësit e tyre, të fituara padrejtësisht gjatë komunizmit jugosllav me mbajtjen e dhunshme të emrave të rrugëve në një komunë me shumicë shqiptare siç është Tetova.
Gjuha e përdorur dje nga SDSM-ja, na kujton gjuhën e urrejtjes dhe të shovinizmit të Lidhjes Komuniste gjatë viteve tetëdhjeta kundër historisë sonë, kulturës dhe identitetit shqiptar.
Riemërimi i emrave të rrugëve të Tetovës me emra nga historia dhe kultura shqiptare është domosdoshmëri e kohës madje i vonuar.
Arsyetimet që nxorrën titistët e parinovuar të SDSM-së, se emrat sllavo-maqedonas që mbajnë rrugët e saj nuk duhet ndryshuar sepse ata përfaqësojnë trashëgiminë historike për Tetovën nuk qëndron.
Ky formulim i zbarët nuk qëndron sepse ”ata patriotë sllavo-maqedonas” nëpër rrugët dhe sheshet e qytetit janë vënduar me dhunë dhe nuk i kanë pyetur shqiptarët, ndaj sot nuk përfaqësojnë vullnetin e qytetarëve shumicë siç janë shqiptarët në Tetovë.
Partitë politike të bllokut sllavo-maqedon vazhdojnë të ushqejnë akoma ëndrrën të dominimit dhe të supremacisë ndaj të drejtës legjitime të shqiptarëve për të vendosur mbi të drejtat e tyre të menaxhimit të shumicës me komunën e tyre siç janë edhe emërimi i rrugëve në një komunë me shumicë shqiptare.
Në këtë vijë kundër ndryshimit te emrave është rreshtuar edhe LSDM-ja si pasardhëse e LKJ-së, e cila dje ka dekluar se këto nisma janë skanare nacionaliste të Kasamit që nuk do të kalojnë.
Në lidhje me këto zhvillime këshilltarja e SDSM-së Adrijana Tomovska, në Këshillin Komunal të Tetovës eshtë shprehur:
“Si partner koalicioni të Kasamit, kërkojmë që Mickoski publikisht t`i bëjë thirrje ta tërheq këtë propozimligj. Këshilltarët e DPMNE-së gjithashtu ta kundërshtojnë dhe të jenë kundër, me çka ky vendim nuk do të miratohet. LSDM-ja publikisht dënon qëllimet e Kasamit për të krijuar ndasi të reja midis qytetarëve dhe tensione etnike. Skenaret nacionaliste të Kasamit dëmtojnë të gjithë qytetarët pa marrë parasysh përkatësinë etnike apo partiake”.
Shfaqjet e shovinizmit dhe të antishqiptarizmit vazhdojnë të paraqiten herë pas here te një parti si SDSM-ja, si pasardhëse e ish LKJ-së, e cila ende nuk është distancuar kundër krimeve të komunizmit jugosllav në Maqedoni e më gjerë ndaj shqiptarëve që nga 1945 e deri më sot.
Ata së bashku, si SDSM-ja edhe VMRO-ja, janë ushtarë të verbër të linjës nacionsliste, ku vazhdojnë ta mbajnë të ndezur edhe më tej ndjenjën e urrejtjes ndaj shqiptarëve.
Prandaj, le ta kenë te qartë si SDSM-ja ashtu dhe VMRO-ja me Levicat se pa liri dhe barazi të shqiptarëve, nuk do të ketë të ardhme as për “Severnën”, e cila po qëndron në këmbë falë patericave shqiptare.
Përgjegjësinë dalzotëse para kombit shqiptar e kanë partitë politike shqiptare dhe intelektualët, kur janë zotuar si dorëzan gjatë fushatave elektorale, por si duket ata kanë hequr dorë nga kjo përgjegjësi kombëtare për hir të leverdive të pushtetit.
Propozimligji i Bilit si kryetar Komune për ndryshimin e emrave të rrugëve të Tetovës të cilët mbajnë padrejtësisht emra të pamerituar nga një kohë e perënduar është i drejt por me pravijë politike për përfitim elektoral.
Për më tepër ky propozimligji është një sajesë e gjetur pseudopatriotike me fishekzjarre para zgjedhjeve lokale, kur dihet se nuk ka asnjë shans që Bili t’i bind pakicat në Këshillin Komunal për ta votuar atë propozimligj për të ndryshuar emrat e rrugëve me emra të një perandorie të fundosur, duke i zëvendësuar ato me emra nga kultura dhe historia shqiptare.
Medai Shaholli