Kryetari i PDK-së Memli Krasniqi, ka reaguar pas rezultateve të rundit të balotazhit.
Theks të veçantë, ai i vuri garës së Mitrovicës, ku tha se kandidati i kësaj partie Arian Tahiri, i vetëm përballë një aparati të tërë shtetëror, bëri një garë dinjitoze.
“Me këtë rast, dua të shpreh mirënjohjen dhe respektin e veçantë për mikun tim, yllin e kësaj fushate, Arian Tahirin në Mitrovicë, i cili, i vetëm përballë tërë aparatit shtetëror, bëri një garë të fortë, dinjitoze dhe të ngushtë deri në fund”, tha Krasnqi transmeton Klankosova.tv.
Krasniqi tha se partia që ai drejton është konfirmuar si partia më e votuar në Kosovë me 187 mijë e 526 vota.
Kreu i Partisë Demokratike, theksoi se në katër prej ballafaqimeve direkte në balotazh me pushtetin qëndror, ne i fituam tri prej tyre.
“Po, disa gara kanë qenë më të vështira, madje edhe të pabarabarta. Por për ne, çdo përpjekje e ndershme është fitore në vetvete, sepse PDK nuk e mat suksesin vetëm me numra, por me qëndresën, qetësinë dhe përgjegjësinë me të cilat e përfaqëson qytetarin në çdo rrethanë”.
Partia Demokratike e Kosovës ka arritur që në këto zgjedhje t’i fitojë 6 komuna: Ferizajn, Prizrenin, Skenderajn, Vushtrrinë, Kaçanikun dhe Hanin e Elezit.