Jemi thellësisht të shqetësuar dhe të tronditur nga sulmi i armatosur ndaj kandidatit tonë dhe bartësit të listës për Komunën e Likovës, dr. Zekirija Shahini, i cili u qëllua nga një person i maskuar dhe u plagos.
Fatmirësisht, jeta e tij është jashtë rrezikut, por vetë fakti që në mes të një fushate zgjedhore ndodh një atentat i tillë përbën një alarm serioz për demokracinë, rendin dhe sigurinë publike në vend.
Ky nuk është një incident i zakonshëm, por një akt i rëndë, i qëllimshëm dhe makabër, që synon të krijojë pasiguri, frikë dhe tension.
Për këtë arsye, ne e dënojmë ashpër këtë akt barbar dhe kriminal, dhe kërkojmë reagim të menjëhershëm, serioz dhe transparent nga institucionet kompetente – veçanërisht nga Ministria e Punëve të Brendshme dhe Prokuroria Publike.
Fshehja e së vërtetës, devijimi apo relativizimi i ngjarjes janë të papranueshme dhe të rrezikshme.
Ndërkohë që MPB njofton se “dy persona në lëvizje kanë qëlluar me armë zjarri ndaj një automjeti”, faktet e para, dëshmitë në terren dhe pamjet e kamerave të sigurisë flasin qartë për një sulm të drejtpërdrejtë nga një individ i armatosur dhe me maskë, që ka vepruar me qëllim të qartë për të rrezikuar jetën e kandidatit tonë.
Ky nuk është incident i thjeshtë, por një ngjarje me indikacione të forta për atentat – dhe duhet trajtuar si e tillë.
Kërkesat tona janë të qarta dhe legjitime:
• Të ndërmerret veprim i menjëhershëm, pa vonesa dhe pa kalkulime politike;
• Të identifikohet dhe arrestohet autori, si dhe çdo person i përfshirë në organizimin e këtij sulmi;
• Të informohet publiku me transparencë dhe përgjegjësi, sepse siguria e qytetarëve është çështje shteti, jo partie.
Ky rast nuk duhet dhe nuk guxon të mbetet pa epilog, dhe ai duhet të jetë i bazuar në fakte.
Çdo heshtje apo vonesë institucionale do të përbënte papërgjegjësi të rëndë dhe rrezik të drejtpërdrejtë për sigurinë e vendit.
Nëse një kandidat politik mund të sulmohet me armë në mes të fushatës zgjedhore, në mes të qytetit, atëherë asnjë qytetar nuk mund të ndihet i sigurt.
Ne paralajmërojmë se tolerimi i dhunës do të ketë pasoja të rënda për sigurinë publike, për procesin zgjedhor dhe për imazhin e institucioneve shtetërore.
Prandaj, i bëjmë thirrje qeverisë, MPB-së dhe Prokurorisë Publike të veprojnë menjëherë dhe me seriozitet, si garantë të rendit dhe ligjit.
Ne do të mbetemi të vendosur në rrugën e ligjshmërisë, maturisë dhe dinjitetit politik.
Demokracia nuk mund të frikësohet me armë, dhe vullneti i qytetarëve nuk mund të ndalet me plumba.