KF Shkëndija 77 e Haraçinës ka reaguar ashpër pas ngjarjeve të shëmtuara që ndodhën sot në stadiumin e Prilepit, ku gjatë ndeshjes u regjistruan fyerje racore, provokime dhe sjellje të papranueshme ndaj lojtarëve dhe tifozëve shqiptarë.
Në reagimin zyrtar të klubit thuhet se ajo që ndodhi në tribuna dhe rreth fushës “nuk i ngjan aspak futbollit dhe frymës sportive që ky sport duhet të përfaqësojë”.
“Fyerjet racore, provokimet dhe sjelljet e shëmtuara nuk e ndihmojnë sportin – përkundrazi, ato e dëmtojnë imazhin e futbollit, klubit dhe vetë garës. Si klub, ne i dënojmë ashpër këto veprime të turpshme që cenojnë dinjitetin dhe sigurinë e lojtarëve dhe tifozëve tanë,” – thuhet në deklaratën e KF Shkëndijës 77.
Klubi kërkon nga Federata e Futbollit të Maqedonisë që të ndërmarrë masa të menjëhershme dhe të ndëshkojë organizatorët e ndeshjes, në mënyrë që ngjarje të tilla të mos përsëriten më.
“Futbolli është lojë që bashkon – jo që ndan,” përfundon reagimi i klubit nga Haraçina.