Qytetarët në Maqedoninë e Veriut nuk mund të marrin kredi që kalojnë 70 për qind të të ardhurave të tyre. Kjo është arsyeja pse rreth 30 mijë kredi të shpejta, që arrijnë vlerën e afërsisht 20 milionë eurove, nuk mund të kthehen nga qytetarët ndaj këtyre shoqërive financiare.
Nga Grupi i Shoqërive Financiare thuhet se për këtë arsye janë ashpërsuar kriteret për miratimin e kredive.
Sipas kryetarit të Grupit të Shoqërive Financiare Jo-Bankare pranë Odës Ekonomike, Nikola Joshevski, është e nevojshme të përmirësohet shërbimi ndaj klientëve dhe të rritet përgjegjësia gjatë procesit të kreditimit.
Biljana Mishiq, nënkryetare e Grupit, shpjegoi se ndryshe nga bankat që në vlerësimin për miratim të kredisë i marrin parasysh të ardhurat e përgjithshme të familjes, shoqëritë jo-bankare i konsiderojnë vetëm të ardhurat e aplikantit.
Nga Grupi bëjnë të ditur se kontrollet janë ashpërsuar dhe se qytetarët do të mund të paraqesin ankesë pranë Odës Ekonomike nëse nuk respektohet Kodi Etik, sipas të cilit janë të obliguara të punojnë 20 shoqëri që janë pjesë e Grupit.
“Financiarisht ne nuk mund të vendosim gjoba, por nëse shkelet Kodi ose nëse një shoqëri financiare merr dy vërejtje ose gjoba nga Ministria e Financave, ne mund ta qortojmë atë nga ana e Odës, dhe në rastin më të rëndë mund ta përjashtojmë nga Oda, përkatësisht nga grupi,” – shtoi Joshevski.
Për shkak të konkurrencës së madhe, siç theksohet nga Grupi, në periudhën e fundit interesat janë ulur ndjeshëm dhe po afrohen me normat që aplikohen nga bankat për kreditë konsumatore.
Numri i shoqërive financiare në vend është zvogëluar nga 36 në 27, pasi nëntë prej tyre kanë humbur licencat, u theksua në konferencën për shtyp që u mbajt sot në Odën Ekonomike.