Qytetarët e Komunës së Tearcës po shprehin zhgënjimin e tyre të thellë ndaj heshtjes së kryetarit të komunës lidhur me hapjen e çerdhes publike në këtë komunë. Sipas denoncimeve nga vetë banorët, të gjitha çerdhet në komunat e tjera janë hapur, ndërsa ajo në Tearcë vazhdon të mbetet e mbyllur pa asnjë shpjegim zyrtar.
Një prind nga Tearca, i shqetësuar për vonesat dhe mungesën e transparencës, i është drejtuar redaksive me këtë mesazh:
“A ka mundësi ta raportoni kryetarin e Komunës së Tearcës për çështjen e çerdhes? Kur do të hapet? Na ka gënjyer disa herë neve si prindër. Të gjitha çerdhet janë hapur, vetëm kjo jo. Ju lutemi, faleminderit.”
Banorët kërkojnë përgjigje konkrete dhe një datë të qartë për funksionalizimin e çerdhes, duke e konsideruar këtë shërbim si domosdoshmëri për prindërit punëtorë dhe për mirëqenien e fëmijëve.
Apelohet për reagim urgjent nga kryetari i Komunës së Tearcës dhe institucionet përgjegjëse.
