Presidenti i Rusisë, Vladimir Putin, ka akuzuar Sekretarin e Përgjithshëm të NATO-s, Mark Rutte, se po shpërfill qëndrimin zyrtar të Shteteve të Bashkuara mbi kërcënimin që paraqet Rusia, duke e akuzuar aleancën se po ushqen një retorikë lufte pa mbështetjen e aleatit të saj kryesor.
Duke folur gjatë emisionit “Direct Line”, i kombinuar me një konferencë për shtyp, Putin iu referua Strategjisë së re të Sigurisë Kombëtare të SHBA-ve, e cila sipas tij nuk e përcakton Rusinë si armik apo objektiv strategjik.
“Dokumenti nuk e konsideron Rusinë si armik, ndërsa Sekretari i Përgjithshëm i NATO-s po përgatitet për luftë me ne. Çfarë është kjo? A di ai të lexojë?”, u shpreh Putin me tone ironike.
Kreu i Kremlinit ngriti pikëpyetje mbi drejtimin që po merr NATO, duke theksuar se është paradoksale që aleanca të flasë për përballje me Rusinë, në një kohë kur Shtetet e Bashkuara – vendi kryesor i saj – nuk e trajtojnë Moskën si kundërshtar të drejtpërdrejtë.
“Si është e mundur që po e shtyni NATO-n drejt luftës me Rusinë, kur vendi kryesor i aleancës nuk na konsideron armik?”, deklaroi Putin.
Në vijim, presidenti rus vuri në dyshim kompetencën profesionale të Mark Rutte-s në krye të NATO-s, duke sugjeruar se ai nuk po e ushtron detyrën me vëmendjen e duhur.
“Niveli i përgatitjes profesionale për këtë pozicion është i pamjaftueshëm. Ai duhet të jetë më i vëmendshëm ndaj detyrave të tij dhe të kuptojë çfarë po ndodh përreth”, tha Putin, duke shtuar se kjo kritikë nuk vlen vetëm për Sekretarin e Përgjithshëm të NATO-s, por edhe për disa liderë të tjerë perëndimorë.