Edhe pse Visar Ganiu është ende kryetar i Komunës së Çairit, kohëve të fundit vërehet mungesa e tij në promovimin e projekteve komunale, siç janë rrugët dhe kanalizimet. Në vend të tij, këto projekte po i promovon ministri i Ekologjisë, Izet Mexhiti – një zhvillim që po cilësohet si absurd nga opinioni publik.
Pyetjet janë të shumta: Me çfarë kompetencash një ministër promovon projekte lokale që janë nën përgjegjësi të komunës? Pse nuk është prezent kryetari Ganiu në këto aktivitete publike? A kemi të bëjmë me mosmarrëveshje të brendshme, apo me një tërheqje të qëllimshme nga skena?
Zhdukja e Ganiut nga skena publike dhe zërat për probleme serioze brenda strukturave të VLEN-it në Çair kanë nxitur diskutime të shumta në opinion. Mos-pjesëmarrja e tij në promovime të rëndësishme si ndërtimi i rrugëve apo rrjetit të kanalizimit lë shumë vend për dyshime dhe spekulime.
Derisa qytetarët kërkojnë transparencë dhe sqarime, situata mbetet e paqartë – dhe pyetja kryesore vazhdon të jetë: Kush po e udhëheq realisht Komunën e Çairit?