Presidenti i Serbisë, Aleksandar Vuçiç, ka njoftuar zgjedhje të parakohshme parlamentare , të cilat do të shpallen para përfundimit të mandatit të parlamentit aktual, ndërsa paralajmëroi edhe zgjedhje të parakohshme lokale, që do të mbahen në disa komuna në Serbi brenda pesë deri në gjashtë muajsh.
“Do të ketë zgjedhje të jashtëzakonshme parlamentare. Para përfundimit të mandatit të mbledhjes aktuale të parlamentit, ne do të shkojmë në ato zgjedhje dhe pastaj njerëzit do të kenë mundësinë të vlerësojnë punën e secilit prej nesh”, tha Vuçiç në Pallatin e Serbisë, duke iu përgjigjur pyetjes së një gazetari.
Vuçiç deklaroi se në zgjedhje qytetarët do të vendosin, “nëse duam të jetojmë në një Serbi të mirë dhe normale”.
“Atëherë njerëzit do të kenë mundësinë të vlerësojnë punën e secilit prej nesh dhe të thonë nëse duam të jetojmë në një Serbi të mirë apo në Serbinë e tyre, nëse duam të jetojmë në një Serbi normale. Pra, këto gjëra janë shumë të rëndësishme dhe më duket se njerëzit në fund të fundit marrin një vendim për këtë”, tha Vuçiç.
Protestat kanë vazhduar në Serbi që nga nëntori i vitit 2024, pasi një tendë u shemb në stacionin hekurudhor në Novi Sad, duke vrarë 16 persona. Protestuesit fajësojnë autoritetet për tragjedinë. Një nga kërkesat e tyre janë zgjedhjet e parakohshme parlamentare.