Ministri i Drejtësisë, Krenar Lloga realizoi takim koordinues me Zëvendëskryetaren e Qeverisë përgjegjëse për Politikat e Qeverisjes së Mirë, Sllavica Gërkovska, kryetarët e Këshillit Gjyqësor dhe Këshillit të Prokurorëve Publikë, Prokurorin Publik të RMV-së, Lubomir Joveski, kryetarët e prokurorive të larta publike dhe PTHP Shkup, koordinatorët e partive më të mëdha politike, përfaqësues nga sektori joqeveritar dhe ekspertë nga Projekti Sundimi i ligjit.
Ndonëse ishte i ftuar edhe koordinatori i Grupit Parlamentar të VMRO-DPMNE-së, ai nuk mori pjesë në mbledhjen e sotme dhe ftesa mbetet e hapur për mbledhjet në vijim, si edhe për të gjitha mbledhjet dhe trupat punues.
Temë e diskutimit ishte propozimi për Ligjin e prokurorisë publike për vendosjen e mbikëqyrjes mbi funksionalitetin e sistemit për ndarjen e lëndëve. Kjo zgjidhje e propozuar ligjore paraqet vazhdimësi të asaj që është bërë para meje, e njëkohësisht me ardhjen time në postin e Ministrit të Drejtësisë, që në fillim të mandatit tim, zotohem për rritjen e transparencës dhe përmirësimin e efikasitetit dhe efektivitetit të prokurorisë publike, si hallkë më e rëndësishme e sistemit të gjyqësorit, tha ministri Lloga.
Në takim u konkludua nevoja për hartimin e ndryshimeve në Ligjin për Prokurorinë Publike dhe Ligjin e ri për Administratën e Prokurorisë Publike dhe u konstatua se sistemi aktual informativ ka mangësi dhe nuk jep rezultatet e pritura.