Presidenti i Republikës së Shqipërisë, Bajram Begaj, zhvilloi një vizitë njëditore në qytetin e Ohrit, me ftesë të Presidentes së Maqedonisë së Veriut, Gordana Siljanovska-Davkova. Vizita u fokusua në forcimin e marrëdhënieve dypalëshe dhe nxitjen e bashkëpunimit rajonal.
Gjatë takimit, u diskutua rëndësia e integrimit europian për të dy vendet, si dhe domosdoshmëria e projekteve të përbashkëta që sjellin përfitime konkrete për qytetarët. Të dy presidentët ndanë vizionin për një bashkëpunim më të ngushtë në fusha si ekonomia, infrastruktura, kultura dhe zhvillimi social.
Presidenti Begaj vuri theksin në rolin e faktorit shqiptar në Maqedoninë e Veriut, të cilin e cilësoi si “urë lidhëse” mes dy shteteve dhe “garanci për progresin e qëndrueshëm të marrëdhënieve ndërmjet Shqipërisë dhe Maqedonisë së Veriut”.
“Shqipëria dhe Maqedonia e Veriut ndajnë vullnetin për të bashkëpunuar në projekte me vlerë për qytetarët tanë. Faktori shqiptar në Maqedoninë e Veriut është urë lidhëse dhe element i rëndësishëm për progresin e vazhdueshëm të marrëdhënieve tona. Zhvillimi i projekteve të përbashkëta – jo vetëm ekonomike e infrastrukturore, por edhe kulturore e sociale – është i arritshëm dhe i mirëpritur. Me forca të përbashkëta drejt progresit,” – u shpreh Presidenti Begaj.
Vizita e Presidentit Begaj vjen në një kohë kur rajoni i Ballkanit Perëndimor po përballet me sfida të reja integruese dhe zhvillimore, ndërsa bashkëpunimi ndërfqinj shihet si kyç për një të ardhme të përbashkët europiane.