Postera politikë në xhami – qytetarët e Strugës reagojnë me indinjatë
Strugë, 6 tetor 2025 – Aktivistë të koalicionit VLEN kanë vendosur postera të kandidatit të tyre Mendi Qyra në muret dhe dritaret e disa xhami në Strugë, duke shkaktuar reagime të ashpra nga qytetarët dhe besimtarët lokalë.
Në fotot që po qarkullojnë në rrjete sociale shihet se në xhami të lagjeve të qytetit, dritaret e ndërtesave fetare janë mbuluar me postera të fushatës zgjedhore. Kjo ka nxitur indinjatë të madhe në opinion, me shumë qytetarë që e quajnë aktin provokim të panevojshëm dhe përdhosje të hapësirave të shenjta.
“Politika duhet t’i mbajë duart larg nga xhamitë. Nëse nuk ndihmoni në mirëmbajtjen e tyre, të paktën mos i dëmtoni,” – ka thënë një nga banorët lokalë përmes një reagimi publik.
Banorët e Strugës theksojnë se objektet fetare janë hapësira të përbashkëta të komunitetit dhe nuk duhet të përdoren për propagandë politike. Ata i kanë bërë thirrje Komunitetit Islam të Strugës që të reagojë dhe të kërkojë heqjen e menjëhershme të materialeve politike.
Vendosja e posterave në muret e xhamive shihet si shkelje e etikës fetare dhe politike, duke përzier hapësirat e adhurimit me interesat partiake.
Ndërkohë, deri në momentin e publikimit të këtij lajmi, nuk ka pasur ndonjë reagim zyrtar nga shtabi i VLEN apo nga vetë kandidati Mendi Qyra.