Shkup, 9 mars – Sipas parashikimeve meteorologjike, këtë verë Ballkani do të përjetojë temperatura rekord të larta. Temperaturat mesatare janë rritur me dy gradë Celsius, duke shkaktuar thatësira dhe stuhi, ndërsa priten edhe shumë valë të të nxehtit, veçanërisht në korrik.
Në atë periudhë, pritet që edhe temperatura minimale e ajrit të tejkalojë mesataren, duke arritur rreth 19 gradë. Nga ana tjetër, temperatura maksimale mund të arrijë mesatarisht deri në 30 gradë.
Mungesa e reshjeve do të vazhdojë edhe në gusht, kur temperatura minimale do të jetë të paktën 18 gradë, ndërsa ajo maksimale pritet të arrijë 30,2 gradë.
Meteorologët theksojnë seriozitetin e situatës dhe paralajmërojnë se Ballkani po i afrohet skenarëve më të këqij të ngrohjes globale.
Nëse nuk merren masa kundër gazrave serrë, deri në vitin 2065 temperatura mund të rritet me 2 gradë Celsius, dhe deri në fund të shekullit, madje deri në 4 gradë.
Studiuesit parashikojnë se, nëse temperaturat rriten në këtë mënyrë, Ballkani, së bashku me Austrinë, Hungarinë, Spanjën, Portugalinë dhe Gjermaninë, mund të shndërrohen në “shkretëtira të pabanuara”.
Mund të duket se një rritje prej një apo katër gradësh nuk është aq serioze, por meteorologët thonë se situata është alarmante:
“Kur një njeri ka temperaturë trupore 36 gradë, është normale; kur arrin në 37, është një sinjal alarmi, dhe me 38 gradë nuk ndihesh mirë… Kur planeti ngrohet me 1 gradë, kjo do të thotë më shumë ngjarje ekstreme klimatike. Prandaj, kemi thatësira, zjarre pyjore, reshje ekstreme dhe përmbytje që vetëm do të bëhen më të rënda në të ardhmen. Do të përjetojmë më shumë dëme dhe jeta në planet do të bëhet më e vështirë.”
Sipas raportit të Organizatës Botërore Meteorologjike të OKB-së, më shumë se 75% e akullit të Antarktidës është shkrirë krahasuar me dhjetëvjeçarin e kaluar, dhe ky lajm shqetësues mund të përkeqësojë kushtet ekstreme të motit në Ballkan.