Drejtori i Agjencisë Kombëtare për Programe Arsimore Evropiane dhe Mobilitet, Petar Bogojeski, ka deklaruar në formularin e pasurisë para Komisionit Shtetëror për Parandalimin e Korrupsionit (KSHPK) një vlerë të lartë të investimeve në kriptovaluta. Ai posedon 11 bitcoin, të cilët i ka vlerësuar me vlerën aktuale prej 59.734.070 denarë (rreth një milion euro), si dhe 129 ethereum të blerë në Serbi për 125.000 euro.
Ngjashëm me drejtorin e Drejtorisë për Ekzekutimin e Sanksioneve, Aleksandar Pandov, edhe Bogojeski është në mesin e funksionarëve që kanë deklaruar investime të konsiderueshme në kripto. Pandov më herët kishte raportuar se zotëron 10 bitcoin, të vlerësuara me gjithsej 600.000 euro, ose rreth 60.000 euro për njësi.
Përveç kriptovalutave, Bogojeski ka edhe një llogari bankare në Bullgari, por pa informacione për gjendjen e saj. Në vitin 2012 ka blerë një banesë me garazh në komunën Karposh, e cila aktualisht vlerësohet në 278.000 euro. Këtë vit, në Rakotincë ka blerë tokë bujqësore me vlerë rreth 26.000 euro. Gjithashtu, vitin e kaluar ka blerë një SUV të ri të modelit “Forting T5EBO” për 30.000 euro.
Sa i përket pjesëmarrjes në biznese, ai zotëron 61% të kompanisë DTU “Begova Korija” SHPK Shkup, e cila menaxhon kompleksin turistik “Shula Mina”, me një vlerë të përgjithshme të vlerësuar në 550.000 euro. Ai gjithashtu ka një investim prej 5.000 euro në kompaninë VFP Fond Menaxhment.
Bogojeski ka raportuar edhe një sërë investimesh financiare të huaja. Që nga viti 2020, ai ka një investim prej 50.000 euro në një fond valutor amerikan dhe një sigurim jetësor me vlerë 15.000 euro. Polica sigurimi kanë edhe bashkëshortja dhe fëmijët e tij, ndërsa fëmijët e tij zotërojnë aksione në një bankë në themelim në SHBA – megjithatë, nuk janë përmendur shuma të sakta.
Ai ka dy llogari devizore (në euro dhe dollarë), dy kasa personale (një në euro, një në denarë), si dhe një llogari devizore në bankë në Bullgari. Po ashtu posedon para të gatshme në valutë të huaj – të trashëguara dhe të fituara – në vlerë prej 120.000 euro.
Në listën e pasurisë është përfshirë edhe stoli ari me vlerë mbi 40.000 euro, si dhe ikona me metale të çmuara me vlerë rreth 20.000 euro.
Rroga mujore e tij si drejtor i agjencisë është 87.000 denarë.