Sekretarja e Përgjithshme e Partisë Demokratike të Kosovës, Vlora Çitaku, ka reaguar pas lajmit se Bordi i Zyrës së Rregullatorit për Energji (ZRRE) ka licencuar dy kompani kosovare për tregtimin e energjisë elektrike, duke përfshirë “Management & Development Associates”, e udhëhequr nga Driton Dalipi, vëllai i shefit të kabinetit të kryeministrit në detyrë, Albin Kurti, pas aplikimit për licencë për furnizim me energji më 27 maj.
Çitaku, përmes një shkrimi në rrjetin social ‘Facebook’, ka vlerësuar se krimi në sektorin e energjisë ka marrë “përmasa galopante”.
“Sot gjithçka vendoset në grupe të mbyllura në ËhatsApp, nga tenderët, te licencat, e deri te ndërprerjet e energjisë elektrike. Dhe në ato grupe janë të përfshirë krerët e kupolës së Vetëvendosjes, ashtu siç tashmë është e dokumentuar edhe nga Prokuroria”, ka shkruar ajo.
Sipas Çitakut, personat e vetëm që ndëshkohen për veprime të tilla janë qytetarët.
“Por faturën nuk e paguajnë ata. Faturën, me gjithë pasojat, po e paguajnë qytetarët, çdo muaj, çdo ditë, çdo orë”.
MDA ka marrë licencën krahas subjektit tjetër “Energy Kosova V.B” në seancën e tetë të Bordit të ZRRE-së për këtë vit, ka njoftuar të enjten ZRRE-ja. Në këtë seancë janë aprovuar edhe kërkesat e 11 subjekteve juridike dhe 14 personave fizik për marrje të autorizimit për vetëkonsum, kapaciteti total i të cilit arrin në 1282 kilovatë.
E licencimi i kompanisë së udhëhequr nga vëllai i shefit të kabinetit të kryeministrit në detyrë, Luan Dalipi, vjen në kohën kur Qeveria në detyrë e Kosovës ka çuar përpara planin për përfshirjen e bizneseve në tregun e liberalizuar të energjisë elektrike.
Në bazë të deklarimit të pasurisë për vitin 2024, shefi i kabinetit të Kurtit nuk ka aksione në MDA. Megjithatë, sipas deklarimit të pasurisë për vitin 2021, ai figuron si themelues i saj. Dalipi është emëruar shef i kabinetit të Kurtit në shkurt 2020.