Kryetari i Bashkimit Demokratik për Integrim, Ali Ahmeti ka përkujtuar sot shënimin e 44 vjetorit të demonstratave studentore, që bën kthimin historik për popullin e Kosovës, për liri dhe pavarësi.
Ahmeti shkruan se kur njerëzit janë të bashkuar, arrijnë të thyejnë barriera dhe të bëjnë ndryshime historike.
Statusi i plotë:
Ali Ahmeti:
Sot shënojmë 44-vjetorin e demonstratave të fuqishme studentore, të cilat u bënë edhe gjithë popullore, dhe të cilat në ballë të tyre, përveç studentëve, ishin edhe punëtorët. Këto demonstrata, 44 vjet më parë, shënuan një moment historik të rëndësishëm, kur, së bashku me shumë bashkëveprimtarë, në mensën e studentëve e filluam ortekun çlirimtar, që do të shkruante një kapitull të ri për popullin tonë.
Ky është një moment që na kujton forcën e bashkimit dhe të angazhimit për liri dhe drejtësi. Demonstratat e 44 viteve më parë, që u shndërruan në një lëvizje masive popullore, ishin një shenjë e fuqisë së bashkimit dhe e dëshirës për ndryshim. Ato e treguan se, kur njerëzit janë të bashkuar për një kauzë të drejtë, mund të arrijnë të thyjnë barriera dhe të bëjnë ndryshime historike.
Së bashku, si studentë e filluam këtë rrugë të vështirë për liri dhe për të drejtat e njeriut, një rrugë që ka lënë një pasqyrë të rëndësishme në historinë e popullit tonë. Çdo sakrificë, çdo angazhim e çdo përpjekje ishin një hap më afër lirisë dhe realizimit të ëndrrës për një të ardhme më të drejtë.
Këtë nismë të lavdishme e kurorëzuam më vonë, pas gati dy dekadave, me fitoren e Ushtrisë Çlirimtare të Kosovës dhe çlirimin e Republikës së Kosovës përgjithmonë. Ky është një moment i ndritshëm i kujtimit të atyre që dhanë jetën dhe mundin e tyre për një Kosovë të lirë dhe të pavarur.
Duke e kujtuar këtë ngjarje të rëndësishme, sot e nderojmë angazhimin dhe sakrificat e të gjithë atyre që u bënë pjesë e këtij orteku çlirimtar. Ne vazhdojmë të ndjekim rrugën e tyre, duke punuar për liri, barazi dhe drejtësi për të gjithë qytetarët e Republikës së Kosovës. Angazhimi i tyre na frymëzon dhe na bën të kujtojmë se lufta për liri dhe dinjitet është një luftë e vazhdueshme që kërkon angazhim dhe guxim. Ne vazhdojmë të jemi besnikë të atij angazhimi dhe të atij idealizmi për të krijuar një të ardhme më të ndritshme për brezat që do të vijnë.
Ali Ahmeti Post