Shkup — Ish-presidenti i Maqedonisë së Veriut, Stevo Pendarovski, ka hedhur poshtë narrativën e qeverisë aktuale se vendi po hyn për herë të parë në histori në një epokë të veçantë marrëdhëniesh me Shtetet e Bashkuara të Amerikës. Në një intervistë për Deutsche Welle, ai theksoi se ndërtimi i aleancave është një detyrë e përhershme për një shtet të vogël si Maqedonia, por propaganda aktuale rreth “raporteve të jashtëzakonshme” me Uashingtonin është e pabazuar.
“S’ka dyshim që është detyra e çdo qeverie të kërkojë miq dhe partnerë, pa marrë parasysh se kush është në pushtet në anën tjetër,” u shpreh Pendarovski. “Por kur na thuhet se ‘kjo po ndodh për herë të parë’, kjo thjesht nuk është e vërtetë.”
Ai kujtoi se në të kaluarën ka pasur edhe më shumë kontakte të nivelit të lartë me SHBA-në: “Kemi pasur një kryeministër që është pritur në Shtëpinë e Bardhë nga George Bush. Kemi pasur një president si Boris Trajkovski që kishte marrëdhënie të ngushta personale me presidentin amerikan të asaj kohe.”
Sipas tij, përkundër retorikës zyrtare, përfitimet konkrete të qeverisë aktuale nga kjo “afrim i ri” me SHBA janë të pakta: “Të vetmet që kemi marrë janë tarifat.” Ai sugjeron se është më e rëndësishme të shihen rezultatet sesa të fryhen momentet protokollare si diçka e paprecedentë.